بۆردوومانێک بۆسەر کۆبانێ قاچەکانی لە فاتمە سەندەوە: ئەو کەسەی هێرشی کردە سەرمان خوشکی نەبوو؟

رووداو دیجیتاڵ

کاژێر 11:30ی شەوی 25ی کانوونی دووەم بوو، کاتێک فاتمە حاجی مەحموود لە ماڵی کچە مامێکیدا لە خەوێکی قووڵدا بوو، نەیدەزانی ئەو شەوە دەبێتە دوایین شەو تێیدا لەسەر قاچەکانی خۆی بوەستێت. تۆپبارانێکی بێ بەزەییانە گوندی "خەراب ئیشک"ی هەژاند و ماڵی خزمەکەی فاتمەی کردە وێرانە.

فاتمە، کە خوێندکاری ساڵی یەکەمی زانکۆی کۆبانییە و بەشی یاسا دەخوێنێت، ئەو ساتە بەم شێوەیە بۆ رووداو دەگێڕێتەوە، "هەستم کرد جەستەم دەسووتێت، کاتێک چاوم کردەوە هەموو شوێنێک ببووە وێرانە." ئەو کچە گەنجە بە دەستە ساردەکانی، بلۆکە قورسەکانی لەسەر قاچە بریندارەکانی لادەدا، بەڵام ئازارەکە ئەوەندە قورس بوو کە تەنیا بە قیژە و هاوارەکەی، براکانی فریای دەکەون.

براکانی نەیانتوانی دەستبەجێ لەژێر داروپەردووەکە دەریبهێنن، بەڵام هێز و ئیرادەیان پێدەدا، فاتمە دەڵێت، "تەنیا شتێک کە ئارامیی پێبەخشیم براکەم بوو، پێی گوتم: بەرگە بگرە، مەڕۆ، مەمرە، باوک و دایکمان لە گوند چاوەڕێمانن، دەچینەوە لایان. بەم قسەیە منی بەهێز کرد." ئیدی تاوەکو کاژێر 09:00ی بەیانی لەناو برین و ئازارەکانیاندا دەمێننەوە. دوای ئەوە گوندنشینەکان بەهانایانەوە دەچن و دەریان دەهێنن و دەیانبەن بۆ نەخۆشخانەی کۆبانی.

لەو شەوەدا، جگە لە فاتمە، کچە مامەکەی و کوڕی کچە مامەکەی بریندار دەبن و هەندێک لە خزمەکانیشی گیان لەدەست دەدەن. فاتمە سەرەڕای ئەو دۆخەی بەسەری هاتووە، دڵخۆشە کە براکانی سەلامەت دەرچوون.

فاتمە نەک تەنیا قاچەکانی، بەڵکو گەورەترین مافی مرۆیی خۆشی لێ زەوت کراوە. دایک و باوکی لە گوندی "خەراب ساروونجێ"ن، بەڵام بەهۆی داخرانی رێگاکان لەلایەن حکومەتی سووریاوە، تاوەکو ئێستا نەیانتوانیوە کچە بریندارەکەیان ببینن. فاتمە دەڵێت، "نە من دەتوانم بڕۆم و نە ئەوانیش دەتوانن بێن."

سەرەڕای لەدەستدانی هەردوو قاچی، فاتمە بڕیاری داوە کۆڵ نەدات. ئەو دەڵێت، ئەو ئازارانەی چەشتوویەتی نایوەستێنن لە تەواوکردنی خوێندنەکەی، "تەنیا بۆ حەزی خۆم ناخوێنم، بۆ خاتری باوکم دەخوێنم. دەمەوێت ببمە پارێزەر، بۆئەوەی داکۆکی لە مافی گەلەکەم بکەم و دژی ئەو نادادپەروەرییە بوەستم کە بەرامبەرمان دەکرێت."

فاتمە ئێستا لەسەر جێگایە، بەڵام دەنگی دەگاتە هەموو شوێنێک. ئەو پرسیار لەو کەسە دەکات کە ئەو شەوە بڕیاری تۆپبارانکردنی ئەو گوندەی داوە و دەڵێت، "ئایا ئەو کەسەی هێرشی کردە سەرمان، خوشکی نەبوو؟ خێزانی نەبوو؟"

داواکاریی فاتمە سادەیە؛ دەیەوێت جارێکی دیکە لەسەر قاچی دەستکرد بوەستێتەوە و سکاڵای یاسایی لە دژی ئەو "دڕندەییە" تۆمار بکات، کە بەرامبەر خەڵکی سڤیلی کۆبانی کرا و دەکرێت.

فاتمە حاجی مەحموود، ئەمڕۆ بووەتە سیمبولی خۆڕاگری. ئەو کچەی قاچەکانی لێسەندرا، بەڵام ئیرادەیەکی پێدراوە کە هیچ چەکێک ناتوانێت بیوەستێنێت. کاتێک چووەوە زانکۆ، خوێندکارەکان لەسەر چۆک پێشوازییان لێکرد، فاتمە سوپاسیان دەکات و دەڵێت، "لە رۆژێکی وا پڕ لە ئازاردا منیان بە تەنیا جێنەهێشت و باری ئازارەکەیان سووک کردم." روو بە جیهانیش دەڵێت، "پێیان دەڵێم؛ من ئەم ئازارەم بینی، با کەسی دیکە نەیبینێت."

فاتمە حاجی مەحموود: سوپاس بۆ خوا، من باشم.

فاتمە حاجی مەحموود: باشم، سوپاس بۆ خوا.

فاتمە حاجی مەحموود: بەڵێ، هێشتا کەمێک ماوە.

فاتمە حاجی مەحموود: بەڵێ دەرمان هەیە. پەرستارەکانیش دوو رۆژ جارێک دێن و سەیری برینەکان دەکەن و پاکیان دەکەنەوە.

فاتمە حاجی مەحموود: لە سەرەتادا هەر باش نەبووم، بەڵام ئێستا هێدی هێدی باشتر دەبم، سوپاس بۆ خوا.

فاتمە حاجی مەحموود: کاتژمێر 11:30ی شەو بوو، ئێمە نووستبووین. لەناکاو دەنگێکی بەهێز هات و هەستم کرد قاچەکانم و جەستەم دەسووتێن. چاوم کردەوە بینیم دەوروبەرم هەمووی بووە بە وێرانە و هیچ نەماوە. تەنیا دەنگی کوڕی پورەکەم دەهات کە منداڵ بوو و دەگریا، بەڵام نەمدەبینین. بلۆکەکانم لەسەر قاچی خۆم لادا بۆ ئەوەی بزانم چیم بەسەر هاتووە. سەیرم کرد قاچەکانم زۆر خراپ بوون و بریندار ببوون. هاوارم کرد، براکەم و ئەوان هاتن و منیان هەڵگرت، بەڵام نەیانتوانی دەستبەجێ لەژێر داروپەردەکە دەرمانبهێنن. تاوەکو کاژێر 09:00ی بەیانی لەناو برین و ئازارەکانماندا ماینەوە. دوای ئەوە گوندنشینەکان هاتن و ئێمەیان دەرهێنا و بردیانین بۆ نەخۆشخانەی کۆبانی.

فاتمە حاج مەحموود: بەڵێ، لە خەودا بووم.

فاتمە حاج مەحموود: نەخێر.

فاتمە حاج مەحموود: ئەو ماڵەی من لێی خەوتبووم ماڵی خۆمان نەبوو، ماڵی خزمێکی نزیکمان بوو، ماڵی کچی مامم بوو. لە خێزانەکەی خۆم، من و سێ براکەم لەوێ بووین، سوپاس بۆ خوا براکانم سەلامەتن و تەنیا من قاچەکانم لەدەستدا. بەڵام ئەو کەسانەی دیکە کە شەهید بوون ئەوانیش خزممان بوون. کچە مامەکەم پەنجەی قاچی بڕایەوە و قاچی کوڕەکەشی زیانی بەرکەوت.

فاتمە حاج مەحموود: قیژاندم... ئەو بیرۆکانەی هاتنە مێشکم زۆر سەخت بوون. بەڵام تەنیا شتێک کە ئارامی پێبەخشیم براکەم بوو، پێی گوتم: بەرگە بگرە، مەڕۆ، مەمرە، باوک و دایکمان لە گوند چاوەڕێمانن، دەچینەوە لایان. بەم قسەیە منیان بەهێز کرد.

فاتمە حاج مەحموود: لە گوندی "خراب ساروونجێ"ن.

فاتمە حاج مەحموود: بەڵێ لەوێن، رێگە نییە کە بێن.