هاوسەرۆکی دەم پارتی: کاتی هەنگاوی دیموکراسی و ناسینی زمانی کوردییە لە دەستووری تورکیادا

تونجەر باکرهان، هاوسەرۆکی دەم پارتی لە هەڤپەیڤینێکدا لەگەڵ هێڤیدار زانا، پێشکێشکاری تۆڕی میدیایی رووداو لە مەیدانی نەورۆزی ئامەد گوتی: "سەرەڕای باران و سەرما، کۆبوونەوەی هەزاران کەس نیشانەی ویستێکی پۆڵایینە بۆ خاوەندارێتی لە مافە نەتەوەییەکان."

باکرهان گوتی: "گەلی کورد 100 ساڵە لە خەباتێکی گەورەدایە و لە ساڵی 2026دا پێویستە تورکیا هەنگاوی کردەیی، دیموکراسی و یاسایی بنێت."

باکرهان لە بارەی چارەسەری پرسی کورد دەڵێت: "دەبێت زمانی کوردی بە فەرمی بناسێندرێ و مافی زمان و کولتووری کورد لە دەستووری تورکیادا جێگیر بکرێ. هەروەها هەزاران چالاکڤان و زیندانیی سیاسی ئازاد بکرێن و بگەڕێنەوە نێو خەباتی مەدەنی."

باکرهان پێی وایە کە پێویستە"کۆتایی بە سیستمی دانانی قەییوم بهێنرێ و ویستی گەل بۆ شارەوانییە هەڵبژێردراوەکان بگەڕێتەوە."

ئەم ساڵیش لە ئامەد لە باکووری کوردستان، گەورەترین کەرنەڤاڵی نەورۆز بەڕێوەدەچێ. ئاگر دەکرێتەوە، ئاهەنگ دەگێڕدرێ و پەیامی سیاسی پێشکێش دەکرێ.

بەگوێرەی زانیارییەکان، ئەمڕۆ جگە لە پەیامی عەبدوڵڵا ئۆجەلان، رێبەری پەکەکە و هاوسەرۆک و بەرپرسانی دەم پارتی، گوتاری نێچیرڤان بارزانی، سەرۆکی هەرێمی کوردستان لەلایەن دڵشاد شەهاب، گوتەبێژی سەرۆکایەتی هەرێمی کوردستانەوە پێشکێش دەکرێ.

تۆڕی میدیایی رووداو هاوشێوەی ساڵانی رابردوو، ئەم ساڵیش رووماڵێکی فراوانی نەورۆزی ئامەد دەکات و تیمی زیاتری ناردووەتە باکووری کوردستان.

تونجەر باکرهان: زۆر سوپاس، نەورۆزی ئێوە و هەموو گەلی کورد لە هەر چوار پارچەی کوردستان پیرۆز بێت. زۆر خۆشحاڵم کە ئێوە لێرەن و ئێمە لە مەیدانی ئامەد دا میوانی رووداوین.

تونجەر باکرهان: ئێمە لێرە لە ئامەدین، نەورۆزی گەلی کورد پیرۆز دەکەین. نەورۆزی قامیشلۆ، کۆبانی، سلێمانی، هەولێر، مهاباد و کرماشان هەمووی پیرۆز دەکەین. بڕوام وایە ئەم نەورۆزە دەبێتە مایەی ئاشتی و ئازادی بۆ کورد. گەلی کورد 100 ساڵە لە خەباتێکی زۆر گەورەدایە. ئێمە ئێستا لە ساڵی 2026ین، ساڵێکە چ گەلی کورد و چ رێکخراوە کوردییەکان و چ بەڕێز ئۆجەلان پەیامی گرنگیان داوە. پێویستە تورکیا هەنگاوی دیموکراسی و یاسایی بنێت. کاتی ئەوە هاتووە ئیدی ویستی گەل و ویستی دیموکراسی سەربکەوێ. ئێمە تێدەکۆشین بۆ ئازادیی کورد و دیموکراسی لە تورکیا. دەبینن، لێرە لە ئامەد هەزاران کەس کۆبوونەتەوە، سەرەڕای باران و سەرما، هاتوون بۆ ئەوەی خاوەندارێتی لە مافەکانی خۆیان بکەن. ویستی گەلی کورد لێرە بە روونی دیارە. 100 ساڵە خەبات دەکەین و کاتی ئەوە هاتووە ئیدی گۆڕانکاریی راستەقینە بکرێت.

تونجەر باکرهان: پرسی کورد 100 ساڵە بەردەوامە. ئێمە دەمانەوێ ئەم پرسە بە شێوەیەکی سیاسی چارەسەر بکرێ. هەندێک هەنگاو هەن کە دەبێت بنرێن، بۆ نموونە پرسی زیندانییە سیاسییەکان، هەزاران هاوڕێمان ئێستا لە زیندانەکاندان، دەبێت رێگەیان بۆ بکرێتەوە تا بگەڕێنەوە نێو ماڵ و خێزان و خەباتی خۆیان. هەروەها دەبێت سیستمی قەییوم نەمێنێت، ویستی گەل لە شارەوانییەکان بگەڕێتەوە. سەبارەت بە دەستوور، زمانی کوردی دەبێت بە فەرمی بناسرێ و مافی زمان و کولتووری کورد لە دەستووردا جێگیر بکرێ. کورد چیدی قبووڵ ناکات لەژێر ستەم و گوشاردا بێت. دەبێت زەوینەیەکی دیموکراسی بۆ سیاسەتکردن هەبێت تا بتوانین بە ئاشتییانە کێشەکان چارەسەر بکەین.

تونجەر باکرهان: بەڵێ، ئێمە هەموو پارچەکان وەک یەک دەبینین. من پێشتر لە رۆژئاڤا بووم. هەر چوار پارچەی کوردستان یەک دڵ و یەک زمان و یەک کولتوورن. نەورۆزی ئامەد پەیامی یەکێتییە. هیوادارم هەموو پارچەکان، رۆژئاڤا، باشوور و رۆژهەڵاتیش بگەنە مافە رەواکانی خۆیان. سەقامگیریی ئامەد پەیوەندی بە هەولێر و سلێمانی و قامشلۆوە هەیە. ئێمە وەک یەک گەل سەیری داهاتووی خۆمان دەکەین.

تونجەر باکرهان: رۆڵی میدیا زۆر گەورەیە. لێرە لە ئامەد رەنگە هەزاران کەس هەبن، بەڵام لە رێگەی ئێوەوە ملیۆنان کەس لە هەولێر و شوێنەکانی دیکە دەمانبینن. میدیای کوردی دەبێت راستگۆ بێت و دەنگی راستەقینەی گەل بگەیەنێت. من دەستخۆشی لە رووداو و هەموو میدیاکارە کوردەکان دەکەم کە ئەرکی خۆیان جێبەجێ دەکەن. هیوای سەرکەوتنتان بۆ دەخوازم. لە کۆتاییدا دەڵێم، با ساڵی 2026 ببێتە ساڵی دیموکراسی و ئاشتی. کاتی ئەوە هاتووە حکومەت و دەسەڵات گوێ لەم دەنگە بگرن کە لێرە لە ئامەدەوە بەرز دەبێتەوە. جەژنی نەورۆز و جەژنی رەمەزانیش لە هەمووان پیرۆز بێت.