رووداو دیجیتاڵ
بەڕێوەبەری ئاسایشی عەفرین رایدەگەیێنێت، ئاسایشی گشتی ئێستا چووەتە نێو هەموو گوندەکانی عەفرین، هەروەها لە شارەکە چەکدار نەماون، پێویستە هەموو کەس بگەڕێتەوە ماڵی خۆی، بۆ ئەوەش، قەدەخە لەسەر هیچ کەسێک نییە.
سەراقە ئەبو ئەحمەد، بەڕێوەبەری ئاسایشی عەفرین لەم هەڤپەیڤینەدا باسی دۆخی ئاسایشی عەفرین، زیندانەکان، بڕینەوەی دار، گەڕانەوەی خەڵک بۆ ماڵەکانیان، رێککەوتنی مەزڵووم عەبدی و ئەحمەد شەرع و چەند پرسێکی دیکە دەکات.
لەبارەی پەیامی ئەو بۆ خەڵکی عەفرین گوتی: "ئێمە داوا لە خەڵکی خۆمان دەکەین کە لەگەڵ ئێمە بن، ئێمە دەبێت بۆ ئەوان قەڵغان بین بۆ پاراستنیان لە هەر هەڕەشەیەک کە لەسەر ژیانیانە، یان هەر مەترسییەک کە دەکەوێتە سەر ناوچەکە، یان دەکەوێتە سەر ژیانی هەر هاووڵاتییەکی سووری کە لەسەر خاکی سووریا دەژی."
لە وەڵامی ئەو پرسیارەی کە ئایا بەندکراوانی نێو زیندانەکانی عەفرین لە ماوەیەکی نزیکدا ئازاد دەکرێن؟ سەراقە ئەبو ئەحمەد رایگەیاند، لە عەفرین تەنیا هەندێک زیندانی ماون کە رێکارەکانی دادوەرییان ماوە تەواوی بکەن، "واتە زیندانییەکانی کە لەبەر هۆکاری سیاسی گیراون، نەماون." گوتیشی، بە گشتی سەیری هەموو زیندانییەکان دەکەن و هەوڵ دەدەن زیندانییەکانی نێو هەموو زیندانەکان ئازاد بکەن.
بڕیار و سزای نوێ هەیە بۆ ئەو کەسانەی دار دەبڕن لە عەفرین. بەڕێوەبەری ئاسایشی شارەکە دەڵێت: هەر کەسێک دارێک ببڕێت، دەبێت 20 دار لە جێی ئەو بچێنێت، کەسێک کە 10 دار دەبڕێت، دەبێت 200 دار بچێنێت، بۆ ئەوەی سەوزایی بۆ ناوچەی عەفرین و چیاکانی بگەڕێنینەوە.
دەقی هەڤپەیڤینی رووداو لەگەڵ بەڕێوەبەری ئاسایشی عەفرین
رووداو: باری ئاسایش ئێستا لە عەفرین و گوندەکانی چۆنە؟
سەراقە ئەبو ئەحمەد: ئێمە ئێستا لە ناوچەی عەفرین داین و پێش دوو مانگ دەستمان پێکرد کە لە لایەن ئاسایشی گشتییەوە ناوچەکە کۆنترۆڵ بکەین. دەستمان بە دروستکردنی بەش و دەزگاکانی ئاسایش کرد بۆ ئەوەی ئاسایشی ناوچەکە کۆنترۆڵ بکەین و هاووڵاتیانی سیڤیلی شارەکە بپارێزین.
رووداو: راستی کشانەوەی گرووپەکانی سەر بە سوپای نیشتمانی لە ناو عەفرین و گوندەکانی چییە و ئایا ئاسایشی گشتی چووەتە ناو هەموو گوندەکانی عەفرین؟
سەراقە ئەبو ئەحمەد: ئاسایشی گشتی بێگومان چووەتە ناو هەموو گوندەکانی شاری عەفرین. دەربارەی وەزارەتی بەرگری، سەر بە گرووپە چەکدارەکانە. لەلایەن وەزیری بەرگرییەوە راگەیێندراوە کە گرووپە چەکدارەکان یان هێزەکانی سەر بە وەزارەتی بەرگری دەبێت بگەڕێنەوە بنکەکانی خۆیان لە عەفرین و دەرەوەی عەفرین بە گشتی لە سووریا.
رووداو: زۆر کورد هێشتا لە زیندانەکان دان، زیندانی رایی و هەروەها زیندانی عەفرینیش. بارودۆخیان چۆنە؟ ئایا لە ماوەیەکی نزیکدا ئازاد دەکرێن؟
سەراقە ئەبو ئەحمەد: ئێمە بۆ زیندانییەکانی هەموو زیندانەکان، بە گشتی سەیریان دەکەین و هەوڵ دەدەین کە زیندانییەکانی هەموو زیندانەکان ئازاد بکەین، بە یارمەتی خودا. چ لە رایی بێت چ لە عەفرین. لە عەفرین تەنیا هەندێک زیندانی ماون کە بۆ ئەوان رێکارەکانی دادوەری هەن، واتە زیندانییەکانی کە لەبەر هۆکاری سیاسی گیراون نەماون. ئەوانەی کە هەن تاوانبارانی تاوانکارن یان تاوانکار نین و شتێکیان کردووە.
رووداو: هەندێک کۆچبەری ئێستا لە عەفرین، کاتێک لە گوندەکان دەردەچن یان دەگەڕێنەوە گوند و شارۆچکەکانی خۆیان، رووداوەکانی تاڵانکردن و دزی ئەنجامدەدەن، هەروەها داوای پارە لە خاوەنی موڵک و ماڵ دەکەن بۆ ئەوەی ئەوان دەربچن. ئایا پلانێکتان بۆ رێگرتن لەم رێکار یان پێشێلکارییانە هەیە؟
سەراقە ئەبو ئەحمەد: بێگومان کاتێک هاتین، گوێمان لە چیرۆکی وا بوو و بەدواداچوونمان کرد. ئێمە ئێستا هاووڵاتیان بۆ لای دامەزراوەی دادوەری دەنێرین، کە کاری ئەو گەڕاندنەوەی ماڵی هاووڵاتییانە. لە کۆتاییدا کەسانێک کە لێرە دەژین دەڵێن کە ئەوان ماڵەکانیان چاک کردووە، بۆیە من بە شێوەیەکی دیکە لەگەڵیان قسە دەکەم و دەڵێم کە تۆ لەم ماڵە بۆ ماوەیەک دانیشتوویت و دەبێت ماڵەکە بگەڕێنیتەوە بۆ خاوەنەکانی و تۆ بگەڕێیتەوە ماڵی خۆت، کە لەلایەن رژێمی نەماوەوە داگیرکرابوو. دەربارەی گەڕانەوەی کۆچبەران، ئەمە لەسەر هەر کەسێک کە ماڵ و موڵکی هەیە دەمێنێتەوە. ئەوەی کە ماڵەکەی باشە دەتوانێت لە ماوەیەکی کورتدا بگەڕێتەوە، بەڵام ئەوەی کە ماڵەکەی وێران بووە، دەبێت راوەستێت هەتا چارەسەرییەک بدۆزێتەوە وەک دروستکردنی چادرێک و دروستکردنی ماڵێک لە شوێنی خۆی. هەموو کەسێک دڵخۆشە بگەڕێتەوە وڵات و لە غەریبی نەمێنێت.
رووداو: زانیاری هەن کە زۆر بنەماڵەی کۆچبەر لە عەفرین دەبێت دوای جەژنی قوربان بە تەواوی دەربچن. ئایا پلانێکی وا هەیە یان چۆنە؟
سەراقە ئەبو ئەحمەد: بە شێوەیەکی ئاسایی زۆر بنەماڵە گەڕاونەتەوە ماڵەکانی خۆیان کە ساخلەمن، بەڵام هەندێک بنەماڵە ماونەتەوە لەبەر ئەوەی کە منداڵەکانیان لە قوتابخانەکان دان، یان شتەکانیان هەن یان ماڵەکانیان وێران بوونە، ئەوان دەمێننەوەوە هەتا هاوین یان بەهار دەست پێبکات بۆ ئەوەی کاتی پەروەردە کۆتایی بێت و ئەوان بگەڕێنەوە شوێنی خۆیان. بەم شێوەیە منداڵەکانیان ساڵی خوێندن لەدەست نادەن. بێگومان لەگەڵ کۆتاییهاتنی قوتابخانەکان، هەموو بنەماڵە بە خۆشحاڵی دەگەڕێنەوە ماڵەکانی خۆیان. ئێمە شتێکی وا ناخوازین، دەرچوون بە تەواوی نییە، بەڵکو خەڵک بە دڵخوازی دەگەڕێنەوە، واتە هەر کەسێک دەگەڕێتەوە ماڵی خۆی.
رووداو: بەپێی ئەوەی کە هەبێت، ئایا دەتوانن ژمارەی کۆچبەرانی ئێستا لە عەفرین بڵێن؟
سەراقە ئەبو ئەحمەد: ژمارەکان هەن، بەڵام من بە تەواوی لێیان ئاگادار نیم، بەڵام من تەخمین دەکەم کە نزیکەی 600 هەزار کەس لە ناوچەی عەفرین هەبوون، کە بێگومان عەفرین و ناوچەکانی دەوروبەری دەگرێتەوە.
رووداو: تاوەکو ئێستا لە 17 گونددا ئاستەنگی لە بەردەم گەڕانەوەی خەڵک بۆ ماڵەکانیان هەیە. رەوشی ئەم گوندانە چۆنە؟ ئایا پلانێکتان بۆ گەڕانەوەی ئەم بنەماڵانە و لابردنی قەدەخە هەیە؟
سەراقە ئەبو ئەحمەد: بێگومان قەدەخە لەسەر هیچ کەسێک نییە، کە بگەڕێتەوە ماڵی خۆی یان گوندی خۆی. کاتێک دەڵێن 17 گوند قەدەخەن کە خەڵکەکەیان لێ بژین، من دەڵێم ئەمە شت نییە. لە ناوچەی عەفرین کە 360 یان 366 گوندی لێیە، هەموویان ئاوەدانن، جگە لە هاووڵاتیانی ئێمە لە ناوچەی حەلەب. واتە نەک هەموو گوندەکان بە تەواوی، بەڵکو هەندێک لەوان لە ناوچەی حەلەب دان لەبەر شەڕ یان کۆچبەرن یان لەبەر کار، بەڵام کاتێک دەگەڕێنەوە ناوچەکە، ئەوان مەسەلەکانی ماڵەکانی خۆیان لە رێگەی دادگاوە بەدوادادەچن و ئێمە دەبێت مافەکان بەدەست بهێنین و بۆ خاوەنەکانیان بگەڕێنینەوە، کە خودا گوتی بەڵێ.
رووداو: دەربارەی گەڕەکە کوردییەکانی حەلەب، شێخ مەقسوود و ئەشرەفییە. ئایا دانوستاندنتان لەگەڵ هێزەکانی سووریای دیموکرات هەیە یان چۆن رێککەوتوون؟
سەراقە ئەبو ئەحمەد: دەربارەی گەڕەکەکانی لە حەلەب، شێخ مەقسوود و ئەشرەفییە، ئێمە هەوڵ دەدەین خاڵەکانی رێککەوتنی کە لەگەڵ سەرۆککۆماری سووریا بەڕێز ئەحمەد شەرع پێکهات، جێبەجێ بکەین بۆ ئەوەی کێشەی شێخ مەقسوود و ئەشرەفییە چارەسەر بکەین، بەڵام ئەم کار و خەباتە کاتی پێویستە بۆ جێبەجێکردنی خاڵەکان، بەڵام بە یارمەتی خودا، ئەم کێشانە لە رۆژانی داهاتوودا چارەسەر دەکرێن.
رووداو: کەواتە دۆسیەی شێخ مەقسوود و ئەشرەفییە لە ناو رێککەوتنی نێوان مەزڵووم عەبدی و ئەحمەد شەرعدا جێگا دەگرێت، کە ناوچەکانی باکوور و رۆژهەڵاتی سووریاش لە خۆ دەگرێت؟
سەراقە ئەبو ئەحمەد: بە گشتی، ئێمە وەک حکومەتی سووریا، دەبێت هەموو خاکی سووریا لە ناو رێککەوتنەکان بن، کە پێک دێن.
بابەتی پەیوەندیدار
هەڤپەیڤین 21/03/2026
هاوسەرۆکی دەم پارتی: کاتی هەنگاوی دیموکراسی و ناسینی زمانی کوردییە لە دەستووری تورکیادا
هەڤپەیڤین 20/03/2026
جۆن بۆڵتن: پشتگیری لە دەوڵەتی سەربەخۆی کورد دەکەم
بەڕاستی شێخ مەقسوود و ئەشرەفییە لە ژێر کۆنترۆڵی هێزەکانی سووریای دیموکرات دان و ئەوانیش لە نێو رێککەوتنەکە دان، لەبەر ئەوەی کە رێککەوتن لەسەر شوێنەکان کە هێزەکانی سووریای دیموکراتیان لێیە پێکهات، نەک لەسەر حەلەب یان رۆژهەڵاتی فورات.
رووداو: ئایا دەبێت هیچ تەنازولێک لەلایەن هێزەکانی سووریای دیموکرات یان حکومەتی سووریاوە هەبن دەربارەی دۆسیەی شێخ مەقسوود و ئەشرەفییە؟
سەراقە ئەبو ئەحمەد: کۆمیتەیەک لەلایەن هێزەکانی سووریای دیموکرات و کۆمیتەیەکی ئەرکدار لەلایەن حکومەتەوە دروست کرا و ئەوان لەسەر ئەم بابەتە کار دەکەن. لەبەر ئەوە بە راستی ئێمە دەگەینە رێککەوتنێک لەسەر شێخ مەقسوود و ئەشرەفییە و رۆژهەڵاتی فورات. ئێمە بە جیدی کار دەکەین بۆ ئەوەی گەلی خۆمان لە هەموو پێکهاتەکان رزگار بکەین، بۆ ئەوەی بتوانین خوێنڕشتن لەسەر خاکی سووریا بوەستێنین.
رووداو: دەربارەی عەفرینییە کۆچبەرەکان کە ئێستا لە ناوچەکانی شێخ مەقسوود و ئەشرەفییە و هەروەها زۆر ناوچە و کەمپەکانی لە باکوور و رۆژهەڵاتی سووریا دەژین، ئایا پلانی گەڕانەوەی ئەوانیش هەیە؟
سەراقە ئەبو ئەحمەد: ئێمە هەوڵ دەدەین کە کاری گەڕانەوەی هاووڵاتیانی خۆمان کورد و عەرەب بۆ گوند و شوێنەکانیان ئاسان بکەین، بەڵام ئەرکی بنەڕەتی ئێمە پاراستنی ئاسایش و سەلامەتی ئەوان لە ناوچەکەیە بۆ ئەوەی خەڵک دەست بە گەڕانەوەی وڵات بکەن. کاتێک ئاسایش و ئاشتی لە وڵات بڵاو دەبێتەوە، بێگومان هەموو خەڵک دەگەڕێنەوە و دەبێت لە ناوچەکە بژین. هیچ شتێک لە ماڵ و وڵات بەهادارتر و گرانبەهاتر نییە. مرۆڤ لە ناوچە و ماڵی خۆی بژی، بۆی باشترە کە لە شوێنێکی دیکە بژی، بەتایبەت لەبەر ئەوەی کە شەڕ 14 ساڵ لە سووریا بەردەوام بوو و گەلی سووریا زۆر ماندوو بوونە. هەموو گەلی سووریا خۆیان قوربانی کرد و فیداکاری کرد، ئامانجی سەرەکی ئێمە رووخاندنی رژێمی ئەسەد بوو و رژێم رووخێنرا. ئێستا ئێمە کار دەکەین کە حکوومەتێک کە سووریا بەرەو ئاسایش و ئاشتی ببات، دروست بکەین. ئەمە خەونی ئێمە و هەر کەسێکی سووریاییە.
رووداو: ئایا هیچ گەرەنتییەک هەیە بۆ گەڕانەوەی بنەماڵەکانی عەفرینی یان کوردەکانی عەفرین لە باکوور و رۆژهەڵاتی سووریا بۆ عەفرین، بەبێ ئەوەی هیچ پێشێلکارییەک لە دژیان بکرێت؟
سەراقە ئەبو ئەحمەد: بێگومان، کاتێک کە ئاسایشی گشتی لە ناوچەی عەفرین بڵاو بووەوە و لە ناوچەکانی وەک شیێ، شەرا، ماباتا، بلبلێ، راجۆ، جندیرێس و عەفرین جێگیر کرا، بەرپرسانی بەشەکان، ژمارەکانی پەیوەندی بۆ بەرپرسانی بەشەکان یان بەرپرسانی سکاڵانامەکان نارد بۆ ئەوەی سکاڵانامەکان وەربگرن، یان کاتێک شتێکی نائاسایی روودەدات، ئێمە گەشتەکان بەرەو شوێن دەنێرین، بۆ ئەوەی ئاسایشی ناوچەکە و ئاسایشی کۆمەڵگا یان سیڤیلەکان کە لەم ناوچەیە دەژین بپارێزین. هەر کەسێک کە دەیەوێت بگەڕێتەوە ماڵی خۆی، ئەم گەڕانەوەیە دەبێت بە دڵخوازی بێت و ئێمە دەبێت هەموو هەوڵی خۆمان بدەین بۆ ئەوەی هاووڵاتییانی خۆمان دڵنیا بکەین و ئەوان بگەڕێنەوە و لە ماڵەکانی خۆیان دابنیشن و ژیانی خۆیان و خوێندنی خۆیان بەردەوام بکەن.
رووداو: کەواتە ئێستا هیچ کاروانی گەڕانەوە لە ناوچەکانی ژێر دەستی هەسەدە بۆ ناوچەکانی عەفرین نییە؟
سەراقە ئەبو ئەحمەد: من لەم بابەتە ئاگادار نیم، لەوانەیە ئەم کارە بەو کۆمیتەی کە لەگەڵ هێزەکانی سووریای دیموکرات دانوستاندن دەکات، دراوە. بەڵام زۆر هاووڵاتیانی ئێمە بە دڵخوازی دەگەڕێنەوە، بەبێ کاروان و زنجیرە کاروانی گەورە. زۆر کەس پەیوەندییان بە منەوە کرد و ئێمە پێمان گوتن کە بگەڕێنەوە، تەنانەت هەندێک کەس ماڵەکانی خۆشیان وەرگرتەوە، بەڵام تەنها ماوەیەک دەخوازێت هەتا ئاسایش لە ناوچەکە جێگیر ببێت.
رووداو: دەربارەی ئازادکردنی زیندانییە کوردەکان لە عەفرین، ئەوانەی کە لە عەفرین یان دەرەوەی عەفرین گیراون، ئایا دەبێت لە ماوەیەکی نزیکدا ئازاد بکرێن؟
سەراقە ئەبو ئەحمەد: ئێمە هەوڵ دەدەین کە لە ماوەیەکی زۆر نزیکدا هەموو زیندانییەکان لەسەر خاکی سووریا، بە یارمەتی خودا، ئازاد بکەین.
رووداو: دەربارەی دۆسیەی گەڕەکە کوردییەکانی شێخ مەقسوود و ئەشرەفییە؟ ئایا لە نێوان ئێوە و هێزەکانی سووریای دیموکرات دانوستاندنەکان هەن دەربارەی ئەم دۆسیانە یان رێککەوتنێک هەیە؟
سەراقە ئەبو ئەحمەد: بێگومان من هەندێک لەمەوبەریش گوتم کە کۆمیتەیەک دروست کراوە بۆ گەیشتن بە رێککەوتنێک یان جێبەجێکردنی رێککەوتنی کە لە شام پێکهات.
رووداو: کەواتە رێککەوتنی شام گەڕەکە کوردییەکانی ئەشرەفییە و شێخ مەقسوودیش لە خۆ دەگرێت؟
سەراقە ئەبو ئەحمەد: رێککەوتنی لە شام، هەموو گەڕەکەکانی ژێر کۆنترۆڵی هێزەکانی سووریای دیموکرات لە خۆ دەگرێت.
رووداو: زۆر پێشێلکاری تۆمار کراون، لەوانە بڕینی دارەکان لەلایەن کەس و بنەماڵەکانی ئێستا لە عەفرین بووە و زیانێکی گەورە چێبووە و خەڵک بەرهەمەکانی خۆیان لە کشتوکاڵ، لەوانە زەیتوون بزر کردووە، تۆ گرنگی زەیتوون بۆ خەڵکی عەفرین دەزانیت. ئایا هیچ تەدبیر لە دژی ئەم کەسانەی کە ئەم پێشێلکارییانە دەکەن گیراوە؟
سەراقە ئەبو ئەحمەد: کاتێک دەستمان بە بڵاوبوونەوە لە ناوچەکە کرد و کاتێک کە سەرۆک ئەحمەد شەرع سەردانی ناوچەی عەفرینی کرد، هەندێک گلەیی هاووڵاتیان لەسەر بڕینی دارەکان هەبوون. ئێمە فەرمانمان لە هەموو خاڵەکانی کۆنترۆڵ دەرهەق هەر کەسێک کە دارەکان دەبڕێت بڵاو کردەوە. دەستمان بە ناردنی مەفرەزەکانی دەوری کرد و ژمارەمان لە گوندەکان بڵاو کردەوە، بۆ ئەوەی ئەگەر ئەوان شتێکی وا ببینن، راستەوخۆ مەفرەزە یان نزیکترین بەشی بەرپرس ئاگادار بکەن بۆ ئەوەی بەرەو ناوچەکان بڕۆن و کەسانێک کە دارەکان دەبڕن بگرن و سزا بدەن. فەرمان لە هەموو بەشەکان بڵاو کرایەوە ، کە کەسێک دارێک دەبڕێت، دەبێت 20 دار لە جێی ئەو بچێنێت، کەسێک کە 10 دار دەبڕێت، دەبێت 200 دار لە جێی ئەو بچێنێت، بۆ ئەوەی سەوزایی بۆ ناوچەی عەفرین و چیاکانی بگەڕێنینەوە.
رووداو: بە هاتنی ئێوە بۆ عەفرین و گوندەکانی، دڵنیاییەکی رێژەیی لە نێوان هاووڵاتییان هەبوو کە بە هاتنی ئێوە دەبێت ئاسایش و ئارامی، رەنگە رێژەیی، هەبێت، لەبەر ئەوەی ماوەیەک پێویستە بەڵکو بۆ کۆتاییهێنانی لاپەڕەکانی پێشوو. چ پەیامێکتان دەتوانن بۆ خەڵکی عەفرین بنێرن دەربارەی ئاسایش و ئارامی لە عەفرین؟
سەراقە ئەبو ئەحمەد: من هیوادارم کە خەڵکی ئێمە لە عەفرین، ئێمە منداڵەکانی ئەوانین و ئێمە کار دەکەین ئاسایشی ئەوان کۆنترۆڵ بکەین و ئاسایش و پاراستنی ئەوان و ئاسایشی هەر کەسێک کە لە سووریا یان لە عەفرین بە تایبەتی دەژی بپارێزین، لەبەر ئەوەی کە ئەرکی ئێمە عەفرینە و ئەرکی براکانی ئێمەش پارێزگاکانی دیکەن. بە یارمەتی خودا، ئێمە بەڵێن دەدەین بە خەڵکی خۆمان کە ئێمە هیچ هەوڵێک لە ناو ڕێ یان لە رێگای پاراستنی ئاسایش و سەلامەتی ئەوان دانانێین.
رووداو: ئایا هیچ تەدبیر یان پلان هەیە بۆ تێکەڵکردنی گەنج و خەڵکی عەفرین لە هێزەکانی ئاسایشی گشتی، لەبەر ئەوەی کە ئەوان خەڵکی ناوچەکەن؟
سەراقە ئەبو ئەحمەد: دەربارەی خەڵک و گەنجانی ئێمە لە عەفرین، ئەوان هاووڵاتیانی سووریان و مافی ئەوان، وەکو هەر هاووڵاتییەکی سووری، هەیە کە خۆیان بۆ ئاسایشی گشتی، وەزارەتی ناوخۆ و وەزارەتی بەرگری کاندید بکەن. ئەو هاووڵاتی سووریایە و مافی ئەو هەیە وەکو هەر هاوڵاتییەک یان هەر پێکهاتەیەک لەسەر خاکی سووریا.
رووداو: هیچ پەیامێک هەیە کە تۆ دەتەوێت بۆ خەڵکی عەفرین و کوردەکانی عەفرین بنێری؟
سەراقە ئەبو ئەحمەد: ئێمە بۆ خەڵکی خۆمان لە عەفرین پەیام دەنێرین، ئێمە لە خەڵکی خۆمان داوا دەکەین کە لەگەڵ ئێمە بن و ئێمە دەبێت بۆ ئەوان قەڵغان بین بۆ پاراستنی ئەوان لە هەر هەڕەشەیەک کە ژیانی ئەوان دەترسێنێت، یان هەر مەترسییەک کە دەچێتە ناو ناوچەکە، یان دەچێتە ناو ژیانی هەر هاووڵاتییەکی سووری کە لەسەر خاکی سووریا دەژی.