رووداو دیجیتاڵ
ئەندامێکی دەستەی سەرۆکایەتیی ئەنجوومەنی نیشتمانیی کورد لە سووریا (ئەنەکەسە)، زانیاریی وردی لەبارەی جووڵە دیپلۆماسییەکانی ئەنەکەسە لە دیمەشق و هەولێر خستەڕوو.
فەسڵە یوسف، ئەندامی دەستەی سەرۆکایەتیی ئەنجوومەنی نیشتمانیی کورد لە سووریا (ئەنەکەسە)، بووە میوانی نووڕۆژی رووداو و وەڵامی پرسیارەکانی نالین حەسەنی دایەوە.
فەسڵە یوسف رایگەیاند، لە دیمەشق لەگەڵ ئەحمەد شەرع، سەرۆککۆماری سووریا و ئەسعەد شەیبانی، وەزیری دەرەوەی سووریا، گفتوگۆی زۆر ورد و قووڵیان کردووە.
هەروەها رایگەیاند، کۆبوونەوەکەیان لەگەڵ ئەحمەد شەرع زیاتر لە کاژێرێکی خایاندووە و "ئەرێنی و کراوە" بووە.
فەسڵە یوسف لەبارەی پێناسەکردنی کورد لەلایەن دیمەشقەوە گوتی، "بەرێز ئەحمەد شەرع بە ئاشکرا گوتی کە کورد بەشێکی رەسەن و سەرەکیی گەلی سووریایە، بەڵام ئێمە پێمان گوت کە ئێمە تەنیا پێکهاتەیەک نین، بەڵکو نەتەوەین، پێویستە ئەم راستییە لە دەستووری نوێدا بەشێوەیەکی فەرمی دانی پێدابنرێت و مافە سیاسی و کولتوورییەکانمان گەرەنتی بکرێن."
داواکارییە سەرەکییەکان: زمان و پەروەردە
لە کۆبوونەوەکانی دیمەشقدا، ئەنەکەسە دۆسیەیەکی فراوانی داواکارییەکانی کوردی پێشکێش کردووە. فەسڵە یوسف ئاماژەی بەوە کرد، داوایان کردووە زمانی کوردی لە سووریا ببێتە زمانی فەرمی و لە هەموو ئاستەکانی خوێندندا بەکاربهێندرێت و گوتی، "پێمان گوتن کێشەی کورد لە سووریا کێشەیەکی نیشتمانییە. چارەسەر بە داننان بە ناسنامەی کورد و دابەشکردنی دادپەروەرانەی دەسەڵات و سامانەکان دەبێت. بەرپرسانی دیمەشق رایانگەیاند کە ئامادەن بۆ گفتوگۆکردن لەسەر هەموو ئەم خاڵانە."
سەردانی دۆحە و پشتیوانیی نێودەوڵەتی
شاندی ئەنەکەسە دوای دیمەشق، سەردانی دۆحەی پایتەختی قەتەری کرد و لەوێ لەگەڵ وەزیری دەوڵەتی قەتەر و بەڕێوەبەرانی وەزارەتەکە کۆبوونەوە.
بابەتی پەیوەندیدار
کوردستان١٤ کاژێر پێش ئێستا
قەیرانی خوێندنەوە لە سلێمانی؛ لە هەر 1200 کەس یەک کەس سەردانی کتێبخانەی کردووە
کوردستان13/04/2026
سەرۆکوەزیرانی بەریتانیا دەچێتە کەنداو؛ گەرەنتیی بە کراوەیی هێشتنەوەی تەنگەی هورمز تاوتوێ دەکات
فەسڵە یوسف لەبارەی ئەم سەردانەوە گوتی، "قەتەر رۆڵێکی گرنگ لە دۆسیەی سووریادا دەگێڕێت. ئەوان پشتیوانیی خۆیان بۆ دیالۆگی ناوخۆیی سووریا و داوا رەواکانی کورد نیشان دا. بۆ ئێمە گرنگە کە لایەنە هەرێمی و نێودەوڵەتییەکان پشتیوانی لە چارەسەرێکی سیاسی بکەن. هەروەها قەتەر ئامادەیی خۆی نیشان دا، ئەگەر لە داهاتوودا لەکاتی دانوستانەکاندا کێشەیەک دروست بێت، رۆڵ بگێڕێت و داوای کرد پەیوەندییەکانیان لەگەڵ ئەنەکەسە بەردەوام بێت."
هەولێر و یەکڕیزیی کورد: پەیامی سەرۆک بارزانی
فەسڵە یوسف تیشکی خستە سەر سەردانەکەیان بۆ هەولێر و کۆبوونەوەیان لەگەڵ سەرۆک مەسعود بارزانی و نێچیرڤان بارزانی، سەرۆکی هەرێمی کوردستان.
یوسف رایگەیاند کە هەرێمی کوردستان هەوڵێکی زۆر بۆ یەکڕیزیی کوردانی سووریا دەدات و گوتی، "سەرۆک بارزانی بە روونی پێی گوتین کە ئەمە دەرفەتێکی مێژووییە و پێویستە کورد بە یەک دەنگ و یەک هەڵوێست بچنە دیمەشق. ئێمە ئێستا کار دەکەین بۆ ئەوەی لەگەڵ لایەنە کوردییەکانی دیکە، بەتایبەتی لەگەڵ هەسەدە و پەیەنەکە، بگەینە تێگەیشتنێکی هاوبەش تاوەکو وەک یەک شاند نوێنەرایەتیی گەلەکەمان بکەین."
رێککەوتنی 29ی کانوونی دووەم و گەڕانەوەی ئاوارەکان
فەسڵە یوسف لەبارەی رێککەوتنی نێوان هەسەدە و دیمەشق، گوتی کە ئەم رێککەوتنە بۆ پاراستنی ناوچەکە لە شەڕ و وێرانی گرنگە، بەڵام پێویستە "بە وردی جێبەجێ بکرێت."
یوسف جەختی لەوە کردەوە کە لابردنی گەمارۆی سەر کۆبانێ و کردنەوەی رێڕەوی مرۆیی پێویستیی بەپەلەن.
فەسڵە یوسف لە کۆتایی قسەکانیدا تیشکی خستە سەر دۆخی عەفرین، گرێ سپی و سەرێ کانی و گوتی، "تاوەکو ئاوارەکانی ئەم ناوچانە بە شکۆ و سەلامەتی نەگەڕێنەوە ماڵەکانیان، چارەسەرێکی تەواو نایەتە ئاراوە. پێویستە گرووپە چەکدارەکان لەنێو شارەکان بچنە دەرەوە و ئاسایش رادەستی خەڵکی ناوچەکە و دامەزراوە فەرمییەکان بکرێت."