رووداو دیجیتاڵ
کۆشکی سپی رایگەیاند، هێزەکانی ئەمریکا لە جەنگی دژی تاراندا زیاتر لە 120 کەشتیی جەنگیی ئێرانیان نووقم کردووە و 7,800 ئامانجیان پێکاوە؛ هاوکات داوای لە هاوپەیمانەکانی ناتۆ و وڵاتانی عەرەبی کرد هەنگاوی زیاتر بنێن بۆ پاراستنی تەنگەى هورمز، چونکە ئەوان زیاتر لە واشنتن پێویستییان بەو رێڕەوەیە.
کارۆلین لیڤیت، گوتەبێژی کۆشکی سپی رۆژی چوارشەممە، 18ـی ئاداری 2026 بە ئاژانسی "فۆکس نیوز"ی راگەیاند، دۆناڵد ترەمپ، سەرۆکی ئەمریکا و تیمەکەی، بەتایبەت وەزیرانی جەنگ و دەرەوە لە پەیوەندیی بەردەوامدان لەگەڵ هاوتاکانیان لە ئەورووپا و هاوپەیمانەکانیان لە ناوچە عەرەبییەکان و کەنداو بۆ ئەوەی رۆڵی زیاتر بگێڕن لە هاوکاریکردنی ویلایەتە یەکگرتووەکان بۆ دابینکردنی ئاسایشی تەنگەى هورمز.
لیڤیت پێیوایە کردنەوەی تەنگەى هورمز زیاتر لە بەرژەوەندیی هاوپەیمانەکاندایە نەک ئەمریکا و گوتی: "ئێمە لە ناوخۆی ئەمریکادا بۆ دابینکردنی وزەی گەلەکەمان، پێویستمان بە تەنگەى هورمز نییە."
گوتەبێژی کۆشکی سپی ئاماژەی بەوە کرد، هاوپەیمانەکانی ناتۆ سوودێکی زۆر زیاتر لە کردنەوەی ئەو رێڕەوە دەبینن بەراورد بە ئەمریکا.
بابەتی پەیوەندیدار
جیهان 11/04/2026
دانوستاندنەکانی نێوان ئەمریکا و ئێران بە چ شێوازێک بەڕێوەدەچن؟
جیهان 08/04/2026
ئاگربەستی ئەمریکا و ئێران راگەیێندرا
لەبارەی زیانە سەربازییەکانی تاران، کۆشکی سپی ئامارێکی نوێی بڵاوکردەوە و رایگەیاند، تاوەکو ئێستا بە وردی زیاتر لە 7,800 ئامانجیان لەنێو ئێراندا پێکاوە و گوتی: "زیاتر لە 120 کەشتیی جەنگیی ئێران ئێستا لە بنی زەریادان."
هەروەها لیڤیت کوژرانی ئیسماعیل خەتیب، وەزیری هەواڵگریی ئێرانی پشتڕاستکردەوە و گوتی: "ئەم پیاوە چیتر لەسەر ئەم زەوییە نەماوە، ئەوەش شتێکی باشە بۆ ویلایەتە یەکگرتووەکان."
واشنتن پێشتر رایگەیاندبوو، توانای هێرشبەریی تاران بە رێژەی 90% دابەزیوە و تاران هیچ بەرگرییەکی ئەوتۆی نەماوە.
پەککەوتنی هەناردەی نەوت لە تەنگەى هورمز بووەتە هۆی بەرزبوونەوەی نرخەکان بۆ 120 دۆلار، بەڵام ئیدارەی ترەمپ دەڵێت، بەهۆی زیادبوونی بەرهەمهێنانی ناوخۆیی و سوودوەرگرتن لە نەوتی ڤەنزوێلا، ئەمریکا دەتوانێت سەربەخۆیی وزەی خۆی بپارێزێت و گوشار دەخاتە سەر وڵاتانی ئەوروپا و کەنداو تاوەکو بەرپرسیارێتیی زیاتر لە ئەستۆ بگرن و لە هاوپەیمانییە دەریاییەکاندا بەشدار بن.