رووداو دیجیتاڵ
ئیلهام ئەحمەد، هاوسەرۆکی فەرمانگەی پەیوەندییەکانی دەرەوەی بەڕێوەبەرایەتیی خۆسەر داوا لە هەردوو گەلی کورد و عەرەب دەکات لە هەر جۆرە شەڕ و ئاژاوەیەک دووربکەونەوە؛ هاوکات پارێزگاری حەسەکەش داوای رێزگرتن لە هێما نیشتمانییەکان دەکات.
ئەمڕۆ شەممە، 21ی ئاداری 2026، ئیلهام ئەحمەد رایگەیاند، ئەم ساڵ بۆ یەکەمجار جەژنی نەورۆز لە سووریا بە شێوەیەکی فەرمی پیرۆزکرا، ئەوەش وەک "ئاماژەیەک بۆ پێکەوەژیان و تەبایی" لە ناوچەکەدا.
ئیلهام ئەحمەد داواکارییەکی ئاراستەی هەردوو گەلی کورد و عەرەب کرد و جەختی لەوە کردەوە، پێویستە هەمووان لەم کاتەدا بە خوێنساردی و دانبەخۆداگرتنەوە رەفتار بکەن. راشیگەیاند، "ناوچەکە پێویستی بە جەنگێکی نوێ نییە و دەبێت رێگری لە هەر هەوڵێک بکرێت کە بیەوێت سەقامگیری تێکبدات."
لە لایەکی دیکەوە، نوورەدین ئەحمەد، پارێزگاری حەسەکە لە پەیامێکدا داوای لە هاووڵاتییان کرد، رێز لە هێما نیشتمانییەکان بگرن و بە گیانی بەرپرسیارێتییەوە رەفتار بکەن.
بابەتی پەیوەندیدار
سووریا23/03/2026
وێنە.. جەژنی منداڵان لە سووریا لەگەڵ پاشماوەی مووشەک
سووریا22/03/2026
لە دیمەشق بۆ یەکەم جار نەورۆز وەکو جەژنێکی نیشتمانی پیرۆز کرا
پارێزگاری حەسەکە هۆشداری دا کە هەر رەفتارێکی نابەرپرسانە ببێتە هۆی لاوازکردنی یەکگرتوویی و تێکدانی پێکەوەژیانی نێوان پێکهاتە جیاوازەکان، بە تووندی رەتدەکرێتەوە و سەرکۆنە دەکرێت.
ئەم گوتانە لە کاتێکدایە، کاژێر 10:00ی بەرەبەیانی ئەمڕۆ شەممە، لە ناوچەی شێخ مەقسوودی شاری حەلەب ئاهەنگێکی تایبەت بە جەژنی نەورۆز بەڕێوەچوو.
لە کاتی گەڕانەوەی هاونیشتمانییانی کورد لە حەلەبەوە بۆ عەفرین، ژمارەیەک هاونیشتمانی لە سنووری تەلڕەفعەت و ئەعزاز لە لایەن دەیان کەسەوە هێرشیان کرایە سەر، ئاڵای کوردستانیان لێ سەندرا و سووتێنرا، سووکایەتییان پێکرا و ئۆتۆمبێلەکانیان تێکشکێندران.