رووداو دیجیتاڵ
بنیامین نەتەنیاهوو، سەرۆکوەزیرانی ئیسرائیل لە پەیامێکی نوێدا هێرشە مووشەکییەکانی ئەم دواییەی ئێرانی وەک بەڵگەی مەترسیی ئەو وڵاتە بۆ سەر جیهان وێنا کرد و دوو ئامانجی سەرەکیی جەنگەکەیانی ئاشکرا کرد، کە بریتین لە لەنێوبردنی بەرنامە ئەتۆمییەکەی ئێران و رەخساندنی زەوینە بۆ رووخاندنی دەسەڵاتی ئەو وڵاتە.
هێرش بۆ سەر شوێنە مەدەنی و پیرۆزەکان
نەتەنیاهوو رایگەیاند، لە 48 کاژێری رابردوودا ئێران ناوچە مەدەنییەکانی کردوەتە ئامانج و مەبەستی بووە هاووڵاتییانی مەدەنی بکوژێ.
مەبەستی نەتەنیاهوو هێرشە مووشەکییەکانی شەوی رابردوو بوو بۆسەر شارۆچکەی عەراد و شارۆچکەی دیمۆنا لە باشووری ئیسرائیل کە لە ئەنجامی هێرشەکەدا زیاتر لە 175 کەس بریندار بوون.
سەرۆکوەزیرانی ئیسرائیل ئاماژەی بەوەش کرد کە ئێران قودس- ئورشەلیمیشی بۆردوومان کردووە و ئەو شوێنە کراوەتە ئامانج کە لە نزیک شوێنە پیرۆزەکانی هەر سێ ئایینە ئاسمانییەکە (دیواری رۆژئاوا، کەنیسەی قیامە و مزگەوتی ئەقسا) و گوتی: "بە پەرجوویەک هیچ کامیان زیانیان بەرنەکەوت، بەڵام ئەوان شوێنە پیرۆزەکانیان کردبووە ئامانج."
مەودای مووشەکەکان و هەڕەشە بۆ سەر ئەورووپا
سەرۆکوەزیرانی ئیسرائیل تیشکی خستە سەر هێرشە مووشەکییەکەی چەند رۆژێک لەمەوبەری ئێران بۆ سەر بنکەی "دیێگۆ گارسیا" لە زەریای هیندی و رایگەیاند، ئەو مووشەکە 4000 کیلۆمەتری بڕیوە.
بابەتی پەیوەندیدار
رۆژهەڵاتی نێوەڕاست26/03/2026
سعودیە پێشوازی لە بڕیارێکی نەتەوە یەکگرتووەکان دەکات بۆ سەرکۆنەکردنی هێرشەکانی ئێران
رۆژهەڵاتی نێوەڕاست26/03/2026
کوێت 6 کەسی بە تۆمەتی پیلانی "تێرۆرکردنی سەرکردەکانی دەوڵەت" دەستگیر کرد
نەتەنیاهوو هۆشداری دا کە ئێستا مووشەکەکانی ئێران توانای ئەوەیان هەیە بگەنە قووڵایی ئەورووپا و پێشتریش قوبرسیان کردووەتە ئامانج.
سەرۆکوەزیرانی ئیسرائیل ئاماژەی بەوەشکرد، ئێران تەنگەی هورمزیشی داخستووە کە نزیکەی 20٪ی نەوت و گازی جیهانی پێدا تێپەڕ دەبێت و گوتی، ئەم هەموو رووداوانە دەیسەلمێنن ئێران بۆسەر هەموو جیهان هەڕەشەیە.
دوو ئامانجە سەرەکییەکەی ئیسرائیل
لەبارەی ئاراستەی جەنگەکەوە، نەتەنیاهوو گوتی: "ئێمە دوو ئامانجی روونمان هەیە. یەکەم، لەنێوبردنی تەواوەتیی بەرنامەی ئەتۆمی و مووشەکیی ئێران و نەهێشتنی توانای دروستکردنی پێکهاتەکانیان. دووەم، رەخساندنی دۆخێک تاوەکو گەلی ئێران" بتوانێت کۆتایی بە دەسەڵاتی ئێستا بهێنێت.
نەتەنیاهوو جەختی کردەوە کە ئیسرائیل و ئەمریکا پێکەوە بۆ ئاسایشی جیهان کاردەکەن و داوای لە سەرکردەکانی وڵاتانی دیکە کرد بچنە پاڵیان.
سەرۆکوەزیرانی ئیسرائیل ستایشی بانگەوازەکەی ترەمپی کرد بۆ رووبەڕووبوونەوەی تاران و گوتی: "پێموایە سەرۆک ترەمپ بە وردی دەزانێت چی دەکات. هەر کارێکیش ئەنجامی بدەین، پێکەوە و بە متمانەیەکی زۆرەوە دەیکەین."