رووداو دیجیتاڵ
محەممەد باقر قالیباف، سەرۆکی پەرلەمانی ئێران هەڕەشەی کرد، کە ئەگەر ویلایەتە یەکگرتووەکانی ئەمریکا و ئیسرائیل هێرش بکەنە سەر ژێرخانی وڵاتەکەی، ئەوا تاران ژێرخانی هەستیاری تەواوی ناوچەکە وێران دەکات.
رۆژی یەکشەممە 22ـی ئاداری 2026، قالیباف لە پۆستێکدا لە تۆڕی کۆمەڵایەتیی ئێکس نووسی: "دەستبەجێ دوای ئەوەی وێستگەکانی کارەبا و ژێرخانی وڵاتەکەمان کرانە ئامانج، ژێرخانی هەستیار و دامەزراوەکانی وزە و نەوت لە سەرانسەری ناوچەکەدا وەک ئامانجی رەوا دەبینرێن و بە شێوەیەکی هەمیشەیی وێران دەکرێن."
سەرۆکی پەرلەمانی ئێران هۆشداریشی دا کە لە ئەنجامی کارێکی وەها، نرخی نەوت لە بازاڕەکانی جیهاندا "بۆ ماوەیەکی درێژ" بەرز دەبێتەوە.
بابەتی پەیوەندیدار
ئێران 25/03/2026
وەزیری دەرەوەی ئێران: هیچ دانوستاندنێک لە ئارادا نییە
ئێران 25/03/2026
مەشهەد بەچڕی بۆردوومان دەکرێت
ئەم هەڕەشەیەی قالیباف دوای ئەوە هات، بەرەبەیانی ئەمڕۆ دۆناڵد ترەمپ 48 کاژێر کاتی دایە تاران بۆ کردنەوەی تەنگەی هورمز.
ترەمپ کاژێر 2:47 خولەکی سەرلەبەیانی ئەمڕۆ بە کاتی هەولێر، لە ترووس سۆشیاڵ نووسی: "ئەگەر ئێران بە تەواوی و بێ هەڕەشە، لە ئێستاوە تاوەکو 48 کاژێری دیکە تەنگەی هورمز نەکاتەوە، ئەوا ئەمریکا هێرش دەکاتە سەر وێستگە جیاجیاکانی کارەبای ئێران و دەیانسڕێتەوە. سەرەتا لە وێستگە گەورەکانەوە دەستپێدەکەین".
تەنگەی هورمز رێڕەوێکی گرنگی بازرگانیی جیهانە و پێش ئەم جەنگە، نزیکەی 20٪ی نەوت و گازی جیهان بەو رێڕەوەدا تێدەپەڕی.