رووداو دیجیتاڵ
وەزیری وزەی ئێران رایگەیاند، ژێرخانی کارەبای وڵاتەکەی بەهۆی پەرشوبڵاویی وێستگەکانەوە لە کاتی هێرش و تەنگژەکاندا خۆڕاگرە، بەڵام هۆشداری دەدات کە ئیسرائیل و وڵاتانی کەنداو بەهۆی چڕکردنەوەی بەرهەمهێنانی وزە لە چەند خاڵێکی دیاریکراودا، "زۆر هەستیار و لاوازن" و بە هێرشێکی کەم پەکیان دەکەوێت.
عەباس عەلی ئابادی، وەزیری وزەی ئێران لە لێدوانێکدا بۆ میدیای وڵاتەکەی، بەراوردکارییەکی بۆ هێزی ژێرخانە ستراتیژییەکانی ئێران و نەیارەکانی کرد و گوتی، "لە ئێران کارەبا بە شێوەیەکی پەرشوبڵاو لە سەرتاسەری وڵاتدا بەرهەم دەهێنین؛ زیاتر لە 150 بۆ 160 وێستگەی گەورەمان هەیە و لە زیاتر لە هەزار شوێنیش وێستگەی وزە نوێبووەوەکانمان هەن."
بە گوتەی وەزیری وزەی ئێران، ئەم شێوازە لە دابەشکردنی وێستگەکان وایکردووە سیستمی وزەی ئێران لە کاتی جەنگدا بە ئاسانی پەکی نەکەوێت، بەڵام دۆخەکە بۆ ئیسرائیل و وڵاتانی دراوسێ پێچەوانەیە.
بابەتی پەیوەندیدار
ئابووری25/03/2026
جووڵەی کەشتییەکان و تەنگەی هورمز؛ کێ نەوتی عێراق دەگوازێتەوە؟
ئابووری25/03/2026
100 بیری نوێی نەوت لە ئامەد لێدەدرێن؛ ئامانج رۆژانە 20 هەزار بەرمیلە
عەباس عەلی ئابادی دەڵێت، "وڵاتانی پەراوێزی کەنداو و رژێمی زایۆنی، کارەبا بە شێوەیەکی چڕ لە چەند وێستگەیەکی کەمدا بەرهەم دەهێنن. ئەگەر ئەو تاوەر و وێستگانە بکرێنە ئامانج و کارەبایان بپچڕێت، تەواوی شارەکانیان پەکدەکەوێت و دەبنە شتێکی بێکەڵک."
وەزیری وزەی ئێران داوا لە هاووڵاتییانی وڵاتەکەی دەکات، "نیگەران نەبن" و جەخت دەکاتەوە، نەیارەکانیان لەڕووی ژێرخانی وزەوە زۆر لەوان لاوازترن.
ئەم لێدوانانە لەکاتێکدان دۆناڵد ترەمپ، سەرۆکی ئەمریکا رۆژی دووشەممە مۆڵەتی لێدان لە ژێرخانی کارەبای ئێرانی بۆ پێنج رۆژی دیکە درێژکردەوە، ئەگەر ئێران لەو ماوەیەدا تەنگەی هورمز نەکاتەوە.