رووداو دیجیتاڵ
فرانک لامپارد لە کاتی دەستبەکاربوونی وەک راهێنەر لە ساڵی 2024، یەکێک لە گەورەترین وەرچەرخانەکانی مێژووی خولی چامپیۆنشیپی ئەنجامداوە و زۆر نزیکە لەوەی وەرزی داهاتوو لە پرێمەرلیگ بێت.
فرانک لامپارد وەرزی رابردوو توانی یانەی کۆڤێنتری سیتی لە مەترسیی دابەزین رزگار بکات و لەم وەرزەدا بیانگەیەنێتە پێشەنگی بێ رکابەری خولەکە، ئەو یانەیە ئێستا بەکۆکردنەوەی 80 خاڵ لە 39 یاری و بە جیاوازیی 9 خاڵ لەگەڵ میدڵزبرۆی نزیکترین رکابەری، زۆر نزیکە لەوەی دوای 25 ساڵ بگەڕێتەوە پرێمەرلیگ.
لامپارد کاتێک ئەرکی راهێنەرایەتیکردنی یانەکەی وەرگرت، لە بارودۆخێکی زۆر خراپدا بوون، بەڵام ئەو بەخێرایی سەقامگیری گەڕاندنەوە، وەرزی رابردوو لە دوایین ساتەکاندا گەیشتنە یارییەکانی پاشکۆی گەیشتن بە پرێمەرلیگ، هەرچەندە ئەوان لە نیوەی کۆتایی ماڵئاواییان کرد، بەڵام ئەو شکسته بووە سەرەتایەک بۆ باڵادەستی ئەمساڵیان.
لەم وەرزەدا، یانەی کۆڤێنتری سیتی بەکۆکردنەوەی 80 خاڵ و تۆمارکردنی 81 گۆڵ، پلەی یەکەمی خولەکەی کردووە، تەنانەت ئەو یانەیە لە 9 یاریی دوای سەری ساڵ، هیچ شکستێکی نەبووە.
گۆڕانکارییە تاکتیکییەکانی لامپارد، کۆڤێنتریی گۆڕی لە یانەیەکی ئاسایی ناوەڕاستی ریزبەندییەوە بۆ یانەیەکی رکابەر بۆ گەیشتن بە پرێمەرلیگ، ئەو یانەیە بەشێوازی گوشاری بەرز و هێرشی خێرا یاریدەکات و توانایەکی بەرزی گۆڵ تۆمارکردنی هەیە.
بابەتی پەیوەندیدار
کۆڤێنتری خاوەنی بەهێزترین هێڵی هێرشبەری خولەکەیە بە تۆمارکردنی 81 گۆڵ، واتە تێکڕای زیاتر لە دوو گۆڵ بۆ هەر یارییەک، لە نمایشە سەرنجڕاکێشەکانیاندا دەتوانین ئاماژە بە تێپەڕاندنی کوینز پارک رێنجەرز بدەین، ئەوان توانیان بەئەنجامی 7-1 لەو یانەیە ببەنەوە. هێرشبەرانی یانەکە لەژێر سیستمەکەی لامپارددا، ئاوێتەیەکیان لە خێرایی، داهێنەری و لێهاتوویی لە تۆپە جێگیرەکاندا دروستکردووە، ئەم هێزە هێرشبەرییە لەگەڵ بەهێزترین هێڵی بەرگری لەنێوان یانەکانی پێشەنگی خولەکە، بزوێنەری سەرەکی ئەو جیاوازییە 9 خاڵییەن.
تەنیا سێ سەرکەوتنی دیکە لە حەوت یاری داهاتوودا،کە لە 3ـی نیسان بەرامبەر دێربی کاونتی دەست پێدەکات، بەسە بۆ ئەوەی نازناوەکە مسۆگەر بکەن "بەپێی پێوەری ئاسایی 90-95 خاڵ". خشتەی یارییە ئاسانەکانیان بەرامبەر تیمەکانی خوارووی ریزبەندی، لامپارد دەخاتە بەردەم دەرفەتێکی مێژوویی تاوەکو وەک رزگارکەری کۆڤێنتری ناوی تۆمار بکرێت.