رووداو دیجیتاڵ
گرووپی سەرایا ئەولیائودەم کە سەر بە گرووپی مقاوەمەی ئیسلامی لە عێراقە، رایگەیاند هەڕەشە لە نێردە دیپلۆماسییەکانی ئەمریکا دەکات لە عێراق، بەوەی ئەگەر لە هێرشکردنە سەر گرووپە چەکدارەکان بەردەوام بێت، شوێنێک بۆیان نامێنێتەوە.
ئەبوومەهدی جەعفەری، گوتەبێژی گرووپی سەرایا ئەولیائودەم، راگەیێندراوێکی لەبارەی بۆردوومانکردنی بنکەیەکی سوپای عێراق لە سەربازگەی حەبانییە لە ئەنبار دەرکرد، کە تێیدا 7 سەرباز کوژران.
گوتەبێژی گرووپی سەرایا ئەولیائودەم دەڵێت: "پێشتر ئاگربەستیان بەسەر ئەمریکادا سەپاندبوو بۆ ئەوەی سەربازەکانیان بە زیندوویی لە بەغدا بکشێننەوە، بەڵام ئەمڕۆ بەردەوامە لەسەر رێڕەوی دووژمنکارانەی و فڕۆکەکانی لەسەر حەبانییە هاتوچۆ دەکەن و بە ئاستێکی نزم دەفڕن و هێرش دەکەنە سەر یەکە سەربازییەکانمان، ئەوەش نێردە دیپلۆماسییەکەیان دەخاتە بەردەم واقیعێکی نوێ و شوێن نامێنێت بۆ بوونی دیپلۆماسی کە پەیوەندیدار بێت بە هێرشکردنە سەر عێراق."
ئەو گرووپە بەرپرسیارێتیی بەشێک لەو هێرشانەی گرتووەتە ئەستۆ کە لە دوای 28ی شوباتەوە کراونەتە سەر هەرێمی کوردستان و نێردە دیپلۆماسییەکان.
ئەبوومەهدی جەعفەری گوتی: "پێویستە دیپلۆماسییەتی عێراق لە شوێنی موقاوەمە فێر بێت و ئەوە بە ئەمریکا بڵێت کە ئێمە لە وڵاتێکی بێدەسەڵاتدا نین، لە وڵاتێک کە سەکۆکانی بەکاربهێنێت بۆ هێرشکردنە سەر رۆڵەکانی."